Shavkat Mirziyoyev O‘zbekiston xalqini Qurbon hayiti bilan tabrikladi

Shavkat Mirziyoyev O‘zbekiston xalqini Qurbon hayiti bilan tabrikladi. Prezident matbuot xizmati tabrik matnini e’lon qildi.

Foto: Prezident matbuot xizmati

Muhtaram vatandoshlar!

Xalqimiz butun musulmon ummati bilan birgalikda katta shodu xurramlik ila kutib olayotgan Qurbon hayiti bilan sizlarni, go‘zal diyorimizdagi barcha mo‘minlarni chin qalbimdan samimiy tabriklab, eng ezgu tilaklarimni bildiraman.

Asrlar davomida el-yurtimizning ma’naviy hayotida beqiyos o‘rin egallab, jamiyatimizda o‘zaro hurmat, mehr-oqibat va bag‘rikenglik tamoyillarini yanada mustahkamlab kelayotgan ushbu qutlug‘ bayram barchamizga muborak bo‘lsin!

Mana shunday shukuhli va saodatli ayyomda hammamiz avvalo Alloh taboraka va taologa beadad shukronalar aytishimiz tabiiydir.

Siz, azizlarga yaxshi ma’lumki, O‘zbekistonda so‘nggi yillarda milliy-diniy qadriyatlarimizni tiklash va rivojlantirish, e’tiqod erkinligini ta’minlashga alohida e’tibor qaratilmoqda, turli millat va elatlar o‘rtasida totuvlik, ahillik va hamjihatlik muhiti tobora yuksalib bormoqda.

Ayniqsa, xalqimizning islom madaniyati va sivilizatsiyasiga qo‘shgan ulkan hissasini mamlakatimiz va dunyo jamoatchiligiga yetkazish, tabarruk qadamjolarni obod qilib, ziyoratgohlarga aylantirish, buyuk ajdodlarimizning ilmiy-ma’naviy merosini chuqur o‘rganish va targ‘ib etish borasida boshlagan xayrli ishlarimiz ilmu ma’rifatning qadriga yetadigan el-yurtimiz va xalqaro hamjamiyat tomonidan to‘liq qo‘llab-quvvatlanmoqda.

Fuqarolarimiz uchun yaratilgan yangi imkoniyat va sharoitlar tufayli ushbu mo‘tabar va ulug‘ ayyom kunlarida Makkai mukarramada muqaddas haj amallarini ado etayotgan 7 mingdan ziyod vatandoshlarimiz bugungi tinch-osoyishta, erkin hayot uchun Parvardigori olamga hamdu sanolar aytib, yurtimizga ravnaq, xalqimizga xayr-baraka so‘rab, duoi fotihalar qilishmoqda.

Hojilarimizning barchasini samimiy muborakbod etib, ularning ona diyorimizga sog‘-salomat qaytib kelishlarini tilaymiz. Ular o‘zlarining ibratli fazilatlari, jamiyat hayotidagi faol ishtiroki bilan yosh avlodimizni el-yurtga sadoqatli va fidoyi, hidoyat yo‘lidan boradigan halhalol va pok insonlar etib tarbiyalashga munosib hissa qo‘shadilar, deb ishonamiz.

Yaratganning ne’matlari ziyoda bo‘layotgan va shukronalik hislari qalblarimizni nurafshon qilayotgan ushbu ayyomda uzoq va yaqin hududlarda joylashgan barcha musulmon mamlakatlarining xalqlarini, xorijiy do‘st va hamkorlarimizni qutlab, ularga tinchlik, bardavom taraqqiyot va farovonlik yor bo‘lishini tilaymiz.

Qadrli yurtdoshlar!

Qurbon hayitining mamlakatimizda mustaqillik bayrami arafasida keng nishonlanishi xalqimizning ruhi va kayfiyatini yanada ko‘tarmoqda.

Ayni shu kunlarda el-yurtimizga xos bo‘lgan mehr-muruvvat, shafqat va saxovat tuyg‘ulari yaqqol namoyon bo‘lib, barchamizni ehtiyojmand, kam ta’minlangan va boquvchisini yo‘qotgan oilalar, nogironlar, yolg‘iz keksalarning holidan xabar olish, ularga moddiy va ma’naviy yordam ko‘rsatish, ziyoratgohlar, muqaddas qadamjolar va qabristonlarni obod qilish kabi savobli ishlarga da’vat etmoqda.

Bunday xayrli amallar mamlakatimizda ijtimoiy hayotning turli sohalarida ro‘yobga chiqarilayotgan, insonni aziz va mukarram deb bilishga, jamiyatimizda qonun va adolat ustuvorligini ta’minlashga qaratilgan islohotlarimizga har tomonlama uyg‘un va hamohangdir.

Biz ularning zamirida islom dinining insonparvarlik mohiyati va qudratini ko‘ramiz, buyuk ma’naviy meros vorislari ekanimizdan haqli ravishda faxrlanamiz.

Hurmatli vatandoshlar!

Barchangizni Qurbon hayiti bayrami bilan yana bir bor chin yurakdan muborakbod etaman.

“Diling – Allohda, qo‘ling – mehnatda bo‘lsin”, degan olijanob e’tiqod bilan yashayotgan xalqimiz doimo omon bo‘lsin!

Jonajon Vatanimiz, xonadonlarimizdan xotirjamlik, ahillik, fayzu baraka hech qachon arimasin!

Ezgu intilish va ishlarimizda Yaratganning o‘zi hamisha madadkor bo‘lsin!

admin

Добавить комментарий

Ваш e-mail не будет опубликован. Обязательные поля помечены *

Next Post

Komil Allamjonov ham Telegram’da rasmiy kanalini yurita boshladi

Пн Авг 19 , 2019
Axborot va ommaviy kommunikatsiyalar agentligi direktori Komil Allamjonov ham Telegram’da rasmiy kanalini yurita boshladi. Allamjonov buni “Telegram hayotimizning bir bo‘lagiga aylanib ulgurgani” bilan izohlagan. “Bu yerda mening nomimdan bir necha soxta kanallar ochilgani haqida ma’lum qilishdi, ana endi men ham siz bilan birgaman. O‘ylaymanki, siz bilan o‘rtamizda mazkur kanal fikr almashish […]